Budhcad badeedda Soomaalida oo doon ganacsi ka afduubtay xeebaha Soomaaliy
Muqdisho, December, 23, 2023 – Doon ayaa lagu af-duubtay meel u dhow xeebaha Soomaaliya, taasoo keentay qeylo dhaan ku saabsan dib u soo cusboonaanta budhcad-badeedda Soomaalida kaddib ku dhawaad toban sano oo xasillooni ah.
Hay’adda Ganacsiga Badaha ee Boqortooyada Ingiriiska (UKMTO) ayaa sheegtay in doon ganacsi ay dad aad u hubeysan ku qabteen meel u dhow degmada Eyl ee xeebaha Soomaaliya.
Xogtan ayaa laga helay saraakiisha ciidamada, balse ma jirto faah faahin dheeraad ah oo laga bixiyay afduubayaasha.
Baaritaanka dhacdadan ayaa hadda socda. Hay’addu ma aysan bixin wax tafaasiil ah oo ku saabsan cidda ay ahaayeen afduubayaasha balse waxa ay sheegtay in baaritaan uu socdo.
Beesha caalamka ayaa weli ka fekeraysa la socodka xaaladda iyo qaadista tallaabooyinka lagama maarmaanka ah si loo ilaaliyo ganacsiga badda iyo amniga gobolka.
Laba todobaad kahor ayay ahayd markii burcad badeed Soomaali ah ay afduubteen markab ganacsi oo calanka Malta ka babanaayay.
Markabka weyn ee Ruen oo ay la socdeen 18-shaqaale ah ayaa laga afduubtay meel u dhow Jaziiradda Socotra ee dalka Yemen, oo qiyaastii 150 mile u jirta xeebaha Soomaaliya.
Mid ka mid ah shaqaalaha markabka ayaa u baahday daryeel caafimaad waxaana loo daadgureeyay markab ay leeyihiin ciidamada badda Hindiya.
